Ein Kärntner kommt ausgehungert, nach vierstündiger Fahrt aus Villach, in Wien an. Er findet den Weg über die Nordbrücke gleich nach Döbling, genauer gesagt auf die Grinzinger Allee (vormals Wiener Straße) zum Würstelstand mit der schönsten Aussicht, der sich da „Zur-Wurst" nennt. Dem Koberer, ein echter „Flax'nvadrara" seit 36 Jahren, kam der gerade recht. Da konnte er mit seiner redegewandten Art dem zufällig vorbeikommenden „Ausheimischen" wieder einmal so richtig zeigen, was Sache ist

Kärntner: „Grüaß Gott, i hätt' gern a Wurscht, bittschean!"
Würstelmann: Lieber Herr: „ Würscht håb i viele. An Haxn, a Brennhaße, a Eitrige, a Doppelg'söchte, an Aspäna!"
Kärntner: „ Nit sovüll, lei oane!"
Würstelmann: „Aba welchane?"
Kärntner: „Nojå, oane hålt, de då bei enk ålle essnt!"
Würstelmann: „Schaun's, so geht des net. Bei uns ißt a jeda wås Ånder's. Da Hr. Walta zum Beispiel ißt nur  mit'bråchte Såch'n und da Burli nur Mannaschnitt'n. Åba die meisten nehmen a Eitrige, wegen da Gustofontän!"
Kärntner: „So, so! Wås gangantn nåchhar schnell, Moaster?"
Würstelmann: „Also, schnö geht bei mir går nix! Außerdem soll ma si für's Essen imma Zeit nehman, a åm Würstelstånd. Des güt a fir Kärntna! Da rechts hängt außerdem eh a Mågenfåhrplan!"
Kärntner: „Woaßt wås, gib mar eanter a Bier!"
Würstelmann: „Mir ham då vaschiedane Glåsweckal: A Bräu am Berg, a Wieselburger, a Hirter"
Kärntner: „Wås is a Bräu am Berg, des Hirta håm ma daham a?"
Würstelmann: „Des kummt aus Frånkenmårkt, aus Oberösterreich, des is a gånz a klane Brauerei, då kenn i sogår den Braumasta Hirsch söwa, a klassa Bursch!" Im Vertraun: Es is mei Lieblingshüsn!
Kärntner: „Aha, soso!"
Würstelmann: „Wås heißt då Aha, glauben's ma vielleicht net?"
Kärntner: „Is scho guat, gib ma hålt dås Bier!"
Würstelmann: „Då håms an guatn Griff g'måcht, des is nämlich des Billigste!"
Kärntner: „Dås is ghupft wia gschprungan, guat sein soll's!"
Würstelmann: „Wolln's a Glasl dazu, oder trinkns's min gånz'n Dreck?"
Kärntner: „Na, gib's lei her, aus dar Flåsch'n z'trinken, bin i seit meiner Geburt gegwöhnt!"
Würstelmann: „Sågn's, wo kommen`s denn her?"
Kärntner: „Von Villach, da heimlichn Håupstådt von Kärntn!"
Würstelmann: „Wås von Villach, kennans då villeicht des Lokal Paragraph ?"
Kärntner: „Jå, wås denn, dås is jå mei Ståmmwirtshaus!"
Würstelmann: „Na des gibt`s do net, da håb i scho öfters Silvester g'feiert. Die håm då a guat's Papperl durt:  „ A Kirchtågssuppn, die ålle Stickln spült, die Kletznnudln und erscht die Hauswürschtln und des Sassaka - i könnt direkt ins Schwärmen kumman!"
Kärntner: „Hearst, hiatz kimmb's mar wiedar, i bin jå humre! Wås für oa Wurscht tast mar
denn onråtn?"
Würstelmann: „A doppeltg'söchte Wåldvirtla wa gråd fertig!"
Kärntner: „A Wåldviertlar, ah då schau her, no, gib se mar hålt!"
Würstelmann: „An G'schissanan, oda an Senftegethoff dazua?"
Kärntner: „Wås is'n dås schon wiedar?"
Würstelmann: "Also, a G'schissana is a Siaßa und a Tegethoff is vom Mauthner Markhoff, a schårfer Senfd!"
Kärntner: „An süaßn hålt!"
Würstelmann: "A Krokodü, oda a Fensterlådntröpfla gefällig?"
Kärntner: „Dås varsteah i nit! Deitsch mar dås aus!"
Würstelmann: „No a Ölpfefferoni, oder an Kren!"
Kärntner: „A Krean schådat gwiß nit, åber gib mar eantar a Bier!"
Würstelmann: „So, då is da Blechschädl!" - Woin's an Bims, oder a Beamtenfurölln villeicht dazu?"
Kärntner: „A Raggale Bråt war mar liaber!"
Würstelmann: „An Bugl, oda an Käu?"
Kärntner: „A Raggale, wånn's geaht!"
Würstelmann: „A påår Glasaug'n gib i Ihna no so drauf, weil's aus Villach san!"
Kärntner: „Aha, so schaugnt de aus! Wia bei uns de kloan Zwiefalan!"
Würstelmann: „Woin's de Wurscht, amål in da Mittn, oder gånz aufg'schnittn håm?"
Kärntner: „Wedar noch!"
Würstelmann: „Wås haast: weda-no?"
Kärntner: „I hån gråd auf de Uhr gschaut, i hån koa Zeit mehr! Dås dauert mar ålls viel z'lång. Påck mar dås Würschtle ein, i wer's währnd dar Fåhrt essn"
Würstelmann: „Soll i Ihna no a Plastikeßzeich dazuagebn?"
Kärntner: „Dås is mar gleich, alln sollst de! Wås kostet dås Gånze?"
Würstelmann: „Ja, die Wurscht und die zwa Hüsn, måcht z'samm 7,40!"
Kärntner: „Då håst zehn Euro und måch dar an schean Tåg! Pfiat di!"
Würstelmann: „ Warten`s, da hätt i no a Stückal frischen Pepihåckalevakaas zum Kosten....................jetzt is a weg!"
Nachdem der Kärntner gegangen ist, hört man den Würstelverkäufer, indem er sich aus dem Würstelstand hinauslehnt, noch brummen: „Des san åba grobe Leit, de Villacha, dastick'n soll a an den Schlick!"

An dieser Stelle darf ich meinem Dichterfreund Herbert Flattner aus Straßburg recht herzlich für diesen urkärntnerischen Beitrag bedanken. Lei-lei